orgaccmm

REUNION CO GRUPO PARLAMENTAR DO  BNG

O pasado día mercores 16 de Outubro, unha delegación da xunta reitora da Organización Galega de comunidades de montes (ORGACCMM) mantivo unha reunión co grupo parlamentar do BNG, representado polo deputado Luis Bará e pola deputada Montserrat Valcarce.

Na reunión a ORGACCMM prantexoulles tres cuestións, solicitándolles a presentación de iniciativas parlamentares sobre as mesmas. A primeira das cuestións prantexadas foi a da nova lei de montes veciñais en man común que está a elaborar a Consellaría do Medio rural. Unha nova lei de montes veciñais que ten como obxetivo fundamental a eliminación do carácter xermánico destas terras veciñais para proceder a súa privatización ou municipalización. En todo caso ¡, para roubarlle estas terras aos seus lexítimos titulares, a veciñanza comuneira.

A ORGACCMM solicitoulle ao grupo parlamentar do BNG a presentación e inciativas parlamentares encamiñadas a parar este roubo e para  acadar unha lei de montes veciñais que reforze o carácter xermánico destas terras e que posibilite o desenvolvemento dos montes veciñais de xeito multifuncional e sustentabel e ao servizo da veciñanza comuneira e da sociedade galega no seu conxunto.

A segunda das cuestións que lle prantexou a ORGACCMM ao deputado e a deputada do grupo parlamentar do BNG foi acerca do estudo sobre os altos valores de conservación dos montes que esta facendo a Dirección Xeral de Ordenación e Planificación Forestal. Se ben pódese considerar que as cuestións medioambientais que prantexa este estudo poden ser aceptabeis, este non contempla a participación dos titulares destes montes, de altos valores de conservación, na elaboración destes criterios como tampouco contempla as compensacións xustas que deben recibir os titulares destes montes porque da función medioambiental que cumplen se beneficia a sociedade no seu conxunto. A ORGACCMM solicitoulle ao grupo parlamentar do BNG a presentación de iniciativas parlamentares de cara a eliminar estas eivas.

A terceira e última cuestión que a ORGACCMM lle prantexou ao grupo parlamentar do BNG  foi a presentación de iniciativas parlamentares para que a liña de axudas para a prevención e defensa contra os lumes forestais sexa efectiva no combate contra esta lacra. Para que sexan publicadas en tempo para que os traballos de prevención se poidan facer antes do mes de maio, para que se revise a superficie mínima do monte para poder ser beneficiario da axuda e para que se modifiquen os criterios técnicos  para poder acollerse a estas axudas, xa que tal e como están ate agora  só son válidos para aqueles montes carentes de xestión .

O deputado Luis Bará e a deputada Montserrat Valcarce, do grupo parlamentar do BNG, amosaron a súa plena disposición a presentar diversas iniciativas parlamentares referentes as cuestións tratadas na reunión.

 

REUNION COS PARTIDOS POLITICOS GALEGOS PARA SOLICITARLLES A
PRESENTACIÓN DE MOCIONS NOS CONCELLOS EN DEFENSA DOS MONTES VECIÑAIS

O pasado venres, 11 de Outubro de 2024, a Organización Galega de comunidades de montes (ORGACCMM) ven de reunirse co PSOE para solicitarlles a presentación de mocións nos concellos de Galiza para a defensa dos montes veciñais en man común. O BNG excusou a sua axistencia por motivos de axenda e o PP non asistiu á reunión .

Na reunión a ORGACCMM solicitoulle ao PSOE a presentación, nos concellos onde teñen representación, de mocións para instar á Consellaría do medio rural e aos partidos políticos de Galiza co fin que que na nova lei de montes veciñais se contemple:

1. Reforzar o carácter xermánico dos montes veciñais.
2. Considerar a veciñanza como único requisito para gozar dos dereitos dos montes veciñais.
3. Declarar como nulos de pleno dereito todos os actos e negocios xurídicos,  así como as posteriores transmisións, levados adiante sen autorizacións das comunidades de montes.
4. Non dotar as comunidades de montes de personalidade xurídica.
5. Reforzar a capacidade xurídica das comunidades de montes para a realización de todos aqueles actos e negocios xurídicos vinculados a xestión e defensa dos recursos dos montes veciñais e dos intereses da veciñanza comuneira.
6. Mantemento dos xurados provinciais de clasificación de montes veciñais.
7. Declarar as comunidades de montes como entidades de interese social e da utilidade pública .

Tamén se lle solicitou que na parte resolutiva da moción se instase ao goberno central que:

1. Se recoñoce aos montes veciñais en man común como titulares distintas e en pé igualdade coas titularidades públicas e privadas.
2. Considerar a todos os efectos que a plena capacidade xurídica das comunidades de montes veciñais en man común e similar a personalidade xurídica para todos os actos e negocios xurídicos vinculados os multiples recursos dos montes veciñais e a defensa dos intereses da veciñanza comuneira .

O PSOE manifestou que levará esta solicitude os seus órganos de goberno e da súa decisiçión informará a ORGACCMM.

A Organización Galega de Comunidades de montes (ORGACCMM) ven de convocar aos/ás responsables de política municipal dos partidos políticos galegos a unha reunión para solicitarlles que presenten nos concellos de Galiza unha moción na que se inste a Consellaría do Medio Rural a que na nova lei de montes veciñais en man común, que está elaborando, se reforze o carácter xermánico destas terras e se potencie que o desenvolvemento dos seus múltiples recursos. Uns montes veciñais que, ademais de ser sustentabeis, deben leven desenvolverse no eido da defensa dos intereses da veciñanza comuneira e das maiorias sociais do pobo galego.

O documento base, con que esta a traballar a Consellaría do Medio rural para a elaboración da nova lei de montes veciñais, denominase “Libro Branco sobre a reforma da regulación dos montes veciñais en man común da comunidade autónoma de Galicia”. Este documento prantexa abertamente a eliminación das características das titularidades  xermánicas (inalienabilidade, imprescritibilidade, indivisibilidade e inembargabilidade). Prantexa a desnaturalización destas terras comunitarias para incluílas no tráfico do comercio. É decir,  para que os montes veciñais en man común poidan ser vendidos, mercados, transmitidos , divididos ou embargados. En definitiva para que os montes veciñais en man común poidan serlle roubados á veciñanza comuneira, quen son os seus lexítimos titulares dende tempos inmemoriais.

Os montes veciñais en man común por ser titularidades de carácter xermánico son terras abertas. Debido a isto, das funcións medioambientais que cumplen (combate o cambio climático, regula o ciclo das augas, preserva a biodiveridade, conserva a flora e a fauna,…) benefíciase toda a sociedade no seu conxunto. O mesmo pódese dicir das funcions sociais que tamén cumplen (defensa da paisaxe, conservación de restos patrimoniais, roteiros de senderismo,…).

Os concellos son a representación democrática da veciñanza das parroquias que os conforman. Xa que logo, estas administracións locais teñen un importante papel que cumplir para que os montes veciñais en man común sigan sendo o que sempre foron, terras comunitarias da veciñanza comuneira, que por ser titularidades  de carácter xermánico son terras abertas e, por tanto, de interese social e de utilidade pública.

Na reunión convocada cos partidos políticos galegos a ORGACCMM entregaralle os puntos fundamentais que deberian contemplar as mocións para que se recollan na futura lei de montes veciñais en man común que se aprobará no Parlamento Galego .

A reunión terá lugar o dia venres 11 de Outubro as 18 horas na casa da comunidade de montes de Noalla (Sanxenxo).

O pasado sábado 28 de Setembro, na casa da comunidade de montes de Noalla, no concello de Sanxenxo, coa asistencia de preto de 200 persoas e de comunidades de montes de todas as zonas de Galiza, celebararonse unhas xornadas tituladas:” A non clasificación e a desclasificación dos montes veciñais “.  Ante esta campaña da Xunta contra o monte comunal que están levando adiante os xurados provinciais de clasificación de montes veciñais e que son corroborados pola xustiza ordinaria e incluso polo Tribunal Superior de Xustiza de Galiza.

Na primeira parte desta Xornada participaron veciñanza comuneira de Entrecruces (Carballo ), de Cha (Ferrol) e a mancomunidade de montes de O Morrazo. Comunidades ás que non se lle clasificaron os seus montes veciñais en base a criterios non contemplados na lexislación vixente, como son o non uso forestal actual, que a superficie a reclamar e pequena e entón non pode ter un uso social rentabel ou que non demostrou a veciñanza un uso continuado destas terras. Este último argumento é totalmente contrario ao carácter imprescriptibel dos montes veciñais.

Tamén participaron as comunidades de montes Hio (Cangas) e Carreira (Ribeira), as que non lle clasificaron parte dos seus montes veciñais por estar situados nas demarcacións marítimo -terrestres ou en figuras de protección, argumentando que os montes veciñais son titularidades de carácter privado. Cando os montes veciñais en man común son titularidades comunitarias, nin públicas nin privadas.

Nesta primeira parte da Xornada tamén participaron as comunidades de montes de Noalla (Sanxenxo) e Cabral (Vigo), ás que lles foron desclasificados parte das súas terras, no primeiro dos casos  a favor do concello por ter o monte veciñal un uso principalmente social. No segundo dos casos, a favor de particulares que durante a dictadura franquista usurparon montes veciñais, é decir, legalizando estas usurpacións dos montes veciñais.

Na segunda parte desta Xornada participaron os representante das comunidades de montes no xurado de clasificación de montes veciñais de Pontevedra, o avogado Calixto Escariz e o presidente da ORGACCMM. Analizaron cales eran as razóns  que unen os intereses capitalistas,  especulativos e urbanísticos, amparados pola Consellería do Medio rural, para roubar os montes veciñais aos seus lexítimos tituares, a veciñanza comuneira.

Celebrouse un debate, ao remate das palestars, sacándose as seguintes CONCLUSIÓNS:

 -As razóns das non clasificacións e mesmo da desclasificación dos montes veciñais, débese a que estas terras son titularidades de carácter xermánico  e están fóra do tráfico do comercio e polo tanto fóra dos negocios .

-Son tamén  razóns destas non clasificacións e desclasificacións o feito de que os montes veciñais están xestionados democraticamente pola veciñanza comuneira.

-Como tamén o son que estas terras comunitarias están no punto de mira da extratexía do capitalismo mundial de acaparación de terras e dos recursos que nelas se dean.

-Nesta situación política, a loita da veciñanza comuneira por conseguir que os montes veciñais en man común sigan sendo titularidades de carácter xermánico situase nun primeiro plano.

-A dia de hoxe, esta defensa dos montes veciñais como titularidades de carácter xermánico hai que centrala na loita contra a nova lei de montes veciñais, que está a elaborar a Consellaría do Medio rural e que pretende  convertir os montes veciñais en man común en titularidades de carácter romano para poder privatizalos ou municipalizalos. En todo caso, para roubarllos a veciñanza comuneira.

-Sen desbotar as vías administrativas e xudiciais, a vía mobilizadora e a vía política deberían ser as prioritarias na defensa dos montes veciñais.

-Na defensa dos montes veciñais, a veciñanza comuneira debe traballar para conseguir alianzas con entidades e asociacións que viven, traballan ou xestionan o medio rural. Coa constitucións de comisións de traballo entre a veciñanza comuneira e as entidades de asociacións que traballan, xestionan e viven no medio rural en diversos campos de acción (funcións sociais, medioambientais, posta multifuncional dos recursos, cuestións xurídicas…).

 

• A veciñanza comuneira de Entrecruces no concello de Carballo e a Organización Galega de Comunidades de montes organizan unha xornada de palestras sobre a non clasificación e a desclasificación dos montes veciñais.

 

 

• A xornada terá lugar na casa da comunidade de montes de Noalla no concello de Sanxenxo, o dia Sabado 28 de Setembro de 2024.

 

A Organización Galega de Comunidades de Montes detectou que dende hai algún tempo os xurados  provinciais de clasificación de montes, organismos dependentes da Consellaría do Medio Rural, non están clasificando, mesmo están desclasificando, montes veciñais en man común baseándose en criterios contrarios ao que dita a lei de montes veciñais en man común actualmente vixente.

Denuncian que para isto os xurados provinciais están utilizando criterios tales que a veciñanza comuneira ten que demostrar o uso continuado destes montes, que as terras teñen que ter somentes un uso forestal ou que teñen que ter unha superficie mínima. Criterios que, sinalan, son contrarios a lei e que logo non son avalados polos tribunais da xustiza ordinaria.

A ORGACCMM alerta que detrás destes criterios hai un intento da Consellería de Medio Rural de eliminar o carácter xermánico dos montes veciñais para usurparlle estas terras á veciñanza comuneira. “No chamado Libro Branco sobre os montes veciñais, que é o documento base para a elaboración de esa nova lei de montes do veciñais do PP, reflíctese que se vai eliminar o carácter inalienable dos montes veciñais, que se reformará o concepto de veciño/a comuneiro/a para dar entrada no mesmo as persoas físicas e xurídicas, aínda que no vivan no lugar, para así entregar o monte veciñal ás grandes empresas madereiras”, declara Pepe Pereiras, presidente da Organización Galega de Comunidades de Montes.

Para denunciar este intento de eliminar o carácter xermánico dos montes veciñais a veciñanza comuneira da parroquia de Entrecruces e a Organización Galega de Comunidades de Montes organizan unha xornada de palestras sobre a non clasificación e a desclasificación dos montes veciñais. Estas charlas e mesas redondas terán lugar na casa da comunidade de  montes de Noalla no concello de Sanxenxo, o sábado 28 de Setembro de 2024.

Nesta xornada de montes analizarase o porqué deste ataque aos montes veciñais en man común e buscaranse as alternativas necesarias  para reforzar o carácter xermánico dos montes veciñais e a consideración dos mesmos como unha titularidade distinta e en pé de igualdade coas titularidade públicas e privadas.

PROGRAMA DAS XORNADA:

10`00 Horas: Presentación das Xornadas a cargo de Germán García  Bugallo membro da ORGACCMM e o Oscar  Vazquez Rama, vecino de Entrecruces (Carballo).

10´30 Horas: Mesa redonda sobre “A non clasificación e a desclasificación dos montes veciñais” coa participación de Roberto Garrido Pérez, presidente da comunidade de montes de Noalla (Sanxenxo) e Ana Maria Gonzalez Cadaval, presidenta da comunidade de montes de Carreira (Ribeira), Antonio Lorenzo Gonzalez, presidente da comunidade de montes de Salvaterra, Xosé Ramón Millán López, presidente da Mancomunidade de montes do Morrazo, Daniel González Vázquez, presidente da comunidade de montes de Hio (Cangas), Maria Teresa Fraga Ferro, veciña de Entrecruces, Jose Mesejo  Santiago, presidente da Asociación Comuneiros do Chá e Luis Rodriguez Perez, presidente comunidade de montes de Cabral (Vigo).                                            

12`00 Horas: Mesa redonda sobre “O porque de estas non clasificacións e desclasificacións dos montes veciñais “ con Xose Carlos Morgade Martinez, representante das comunidades de montes no Xurado provincial de clasificación de montes veciñais de Pontevedra, Calixto Escariz Vazquez, avogado especializado e Xose Alfredo Pereira Martinez, presidente da ORGACCMM.

13`00 Horas:  Debate

14`00 Horas:  Xantar 

16´30 Horas:  Proxección da unidade didáctica sobre o monte veciñal a cargo de Claudio Quintillán Vallejo, presidente de Ingateco.

17´30  Horas: Lectura das conclusións e peche da Xornada a cargo de Generosa Gey Piñeiro, vicepresidenta da ORGACCMM.

COMO PARTICIPAR NAS XORNADAS: As comunidades de montes e as persoas que queiran participar na Xornada poden facelo chamando ao moóbil 649137135 ou no correio electrónico antes do dia 27 de Setembro de 2024.

 

• O pasado día 16 de Maio, unha delegación da xunta reitora da ORGACCMM , mantivo unha reunión coa señora conselleira do Medio Rural, que estivo acompañada polo Director Xeral de Ordenación e Planificación Forestal e polo Director Xeral de Defensa do monte.

Unha das cuestións que se lle prantexou a conselleira foi que a futura lei de montes veciñais en man común ten que asegurar a defensa dos montes veciñais como titularidades de carácter xermánico e a defensa dos intereses da veciñanza comuneira. Todo o contrario do que reflicta o último texto do Libro Branco sobre a reforma da regulación  dos montes veciñais en man común. Se ben o Director Xeral de Planificación e Ordenación Forestal manifestou que este texto do Libro Blanco é un primeiro borrador e que a Consellaría do medio rural está elaborando o texto definitivo para sometelo a consulta pública. E deste derivarase o borrador da futura lei de montes veciñais, que tamén será sometida a consulta pública.

A ORGACCMM prantexoulle que cando menos a futura lei de montes veciñais en man comúntiña que contemplar:

1. O reforzamento do carácter xermánico dos montes veciñais.
2. A declaración de nulos de pleno dereito todos as actos e negocios xurídicos realizados nos montes veciñais sen consentimento das comunidades de montes.
3. Manter os xurados provinciais de clasificación de montes veciñais.
4. Non dotar as comunidades de montes de personalidade xurídica.

No curso do debate destas cuestións, aos representantes da Consellaría do medio rural notouselle un cambio. Non un cambio de postura dos seus prantexámentos, máis si de actitude. De feito, manifestáronse dispostos a debater estas cuestións coa ORGACCMM, mesmo manifestáronse dispostos e eliminar que  no título de dominio sobre os montes veciñais seria suficente a posesión inmemorial de forma consuetudinaira da veciñanza comuneira e non continuada (o que asentaría definitivamente o carácter de imprescritibilidade dos montes veciñais ) e manter os xurados de clasificación de montes veciñais (o que posibilitaría a declaración como montes veciñais en man común terras susceptibeis de selo, para que aínda non están clasificados).

Inclusive na cuestión de dotar as comunidades de montes de personalidade xurídica quixo botar balóns fora dicindo que  non e unha liña vermella da Consellaría do medio rural e que se a prantexan no Libro Branco sobre os montes veciñais era porque está solicitada por entidades relacionadas con comunidades de montes (asociacións forestais, ramas forestais de algún sindicato agrario, consultorías…..). Claro que non recollle, no Libro Blanco, que tamén hai organizacións de comunidades de montes que si  piden que non se doten de personalidade xurídica as comunidades de montes, como no caso da ropia  ORGACCMM.

Se ben o segundo argumento é certo, o primeiro non o é. A Consellaría do medio rural sempre tentou dotar ás comunidades de montes de personalidade xurídica para facilitar a privatización dos montes veciñais e mesmo foi o principal argumento esgrimido pola portavoz do Partido Popular no Parlamento Galego para rexeitar a lei de montes veciñais contida na Iniciativa Lexislativa Popular proposta pola ORGACCMM.

Fica claro que, de momento, este cambio da Consellaría do medio rural ao respeito de futura lei de montes veciñais, non de principios máis si de actitude, debese unica e exclusivamente á actitude mobilizadora das comunidades de montes na defensa de unha lei de montes axeitada. Acción mobilizadora que se manifestou nas celebracións da asembleas territoriais informativas,  varias manifestacións en Compostela e, sobre todo, na presentación da Iniciativa Lexislativa Popular avalada por 12.010 sinaturas.

Se as comunidades de montes seguimos con  esta acción mobilízadora é moi posibel que academos unha lei de montes veciñais acaida para o monte veciñal e para a veciñanza comuneira. Por esta cuestión, a ORGACCMM chama ás comunidades de montes a que sigan coa acción mobilizadora mediante debater a cuestión nas asembleas xerais, recoller sinaturas de apoio nas entidades e asociacións da parroquia relacionados co monte veciñal, organizar xornadas sobre esta cuestión e todas aquelas que se consideren oportunas e no seu momento tentar de organizar novas manifestacións.

Se nos fiamos do proceso que nos explicou o director xeral de ordenación e planificación forestal, o borrador da futura lei de montes veciñais non estará a debate ate a primavera do ano que ben. Mais este tempo non debería servir para relaxarnos. Temos que seguir, dende hoxe, coas acción mobilizadoras en defensa do monte veciñal.

No camiño de defensa do monte veciñal  e dos intereses da veciñanza comuneira, tamén sería moi importante que as comunidades de montes asociadas as entidades relacionadas con comunidades de montes (asociacións foretais, ramas forestais de algún sindicato agrario ,consultorias,..) das que fala o Director Xeral de ordenación e planificación forestal, se dirixiran as mesmas solicitándolle que cando sexa público o borrador da nova lei de montes veciñais en man común lles prantexen a Consellaría do medio rural  as reinvindicacións fundamentais arriba indicadas.

Se as comunidades de montes somos quen de facer este traballo, case poderiamos asegurar que a lei de montes veciñais que saia do Parlamento Galego será unha lei que defenda o monte veciñal e os intereses da veciñanza comuneira.

A ORGACCMM na súa Asamblea Xeral Ordinaria acorda posicionarse en contra da invasión de Israel dos territorios Palestinos e da masacre e devastación que esta a levar a cabo coa poboación, vulnerando todos os Tratados Internacionais, sen o mais minimo respecto os Dereitos Humanos provocando un xenocidio. Demandamos o cese de esta masacre e esiximos o recoñecemento pola ONU e os seus paises membros dun Estado Palestino.

A Organización Galega de Comunidades de montes veciñais en man común (ORGACCMM), apoia a manifestación ,que convoca a Plataforma Ulloa Viva , contra a instalación do proxecto Altri en Palas de Rei. Manifestación que terá lugar o domingo 26 de Maio de 2024, ás 1200 horas, saíndo do Poligono Industrial de Palas de Rei e que ten como lema “Pola defensa do territorio,dende o Ulloa  ate a ría, terra, auga ,aire son vida”.

Para a produción de 400 mil toneladas métricas  de celulosa solubel e de 200 mil toneladas métricas de lyocel ao ano,  a empresa promotora da instalación, precisa un consumo anual de 12 millóns de metros cúbicos de eucalipto. Segundo os datos do Inventario Forestal Continuo, feitos públicos o pasado mes de xuño, a superficie ocupada pola eucalipto no monte galego ,superou en case 400 mil hectareas  o planificado no Plano Forestal de Galiza que rematou no ano 2021.

A instalación da factoría de Altri, aínda incrementaría máis este desfase, potenciando un monte forestalista e xa que logo sen futuro xa que o futuro pasa por acadar un monte multifuncional e sustentabel. Ademais, está demostrado que un modelo de monte forestalista con especies de crecimento rápido é unha das causas dos lumes no territorio galego.

A Organización Galega de comunidades de montes entende que a instalación do proxecto Altri  xerará unha industria de enclave (extrativa e expoliadora da riqueza do territorio), xa que non pecha o ciclo productivo .Ademais de contribuir a disminución da superficie útil agraria e condenará ao peche das actividadas do sector primario ,secundario e terciario que se dan na zona onde se vai a instalar.

Por estes motivos a ORGACCMM ,fai un chamamento a veciñaza comuneira para que asista a manifestación que terá lugar o domingo 26 de maio en Palas de Rei para decirlle non ao proxecto de Altri.

A ORGACCMM ven de recibir da fundación Montescola unha comunicación na que nos informa de un proxecto denominado  Comunidades Activas e Paisaxes Resilientes a Incendios Forestais e Cambio Climático, e convida Ás comunidades de montes a  participar no mesmo .

Este proxecto, que conta con unha axuda da fundación Biodiversidad e que coordena a fundación Juana de Vega, consiste en :

• Realización de 5 visitas  de intercambio a 5 montes veciñais.
• Elaborar un Atlas de Boas Práticas de Conservación  Comunitaria.

Aquelas comunidades de montes que dexesen participar no mesmo, deben porse en  contacto coa fundación Montescola (info@montescola.org).

• A Organización Galega de Comunidades de Montes (ORGACCMM), ven de presentar diante da Secretaria Xeral de Industria da Consellaría de Economía, Industria e Innovación alegacións á implantación dunha industria de fibra téxtil  a base de celulosa, que promovida pola empresa Greenfiber S.L, preténdese instalar en Palas de Rei co nome de proxecto GAMA.

Coas achegas presentadas solicítase da Secretaría Xeral de Industria que lle denegue  á empresa Greenfiber S.L as correspondentes autorizacións  para a instalación da industria de fibra téxtil  e que se arquive o expedente.

O proxecto de Altri pretende producir 600 mil toneladas de celulosa solúbel  e lyocel. Para tal produción de celulosa a empresa precisa o consumo de 1´2 millóns de toneladas/ano de eucalipto. Isto vai supor, necesariamente, un incremento de  terras adicadas ao cultivo desta especie forestal.

Os primeiros datos do Inventario Forestal Continuo de Galiza, publicados no mes de Xuño do ano pasado, certificaron que a superficie do monte galego ocupada polo eucalipto superou en perto de 400 mil hectareas  o planificado no Plano forestal de Galiza para o ano 2021. O proxecto de Altri ven aínda a rachar máis esta planificación, dado que vai precisar máis terras adicadas ao cultivo deesta especie forestal. Polo tanto, o proxecto GAMA de Altri ven a fomentar un modelo de monte forestalista, neste caso  con especies de crecimento rápido, cando o monte de futuro pasa por conquerir  un monte multifuncional e sustentabel .

O proxecto Altri vai producir celulosa destinada a exportación, xa que logo non vai pechar o ciclo produtivo da produción e polo tanto non vai xerar valor engadido na zona . Vai potenciar de novo unha industria de enclave  e espoliadora dos recursos.

Na bisbarra onde se pretende instalar a factoría de Altri hai un importante sector agrogandeiro e existen diferentes empresas, moitas delas de produción ecolóxicas, que se asentan sobor o sector primario. Estas actividades económicas verían mermadas a súa produción, cando non abocadas ao peche. A instalación da macrodelulosa de Altri nestas terras contribuiría a unha maior disminución da superficie útil agraria e eliminaría outras actividades económicas e sociais que se dan na zona coa conseguinte despoboación do medio rural.

Na realidade, a instalación da macrocelulosa de Altri  nas terras da Ulloa propiciaría un modelo de monte forestalista en rexime de monocultivo forestal con especies de crecemento rápido e provocaría a despoboación da zona. E está constatado que a forestación salvaxe e o despoboamento do medio rural son dúas das causas principais que propician que os lumes sigan sendo unha lacra para o territorio e para as pobaocións que neles habitan.